Tv-aksjonen 2020 går til organisasjonen WWF. Masfjorden Senterparti ynskjer ikkje å vere med på å støtte årets tv-aksjon. WWF er ein organisasjon som arbeider aktivt mot mange av SP sine saker om eit levande og trygt bygdemiljø i heile landet. Dei vil verne alle store rovdyr som ulv og bjørn, går inn for storstilt vern av skog og naturområder, men er ikkje mot vindkraftutbygging i norske fjellområder. Dei har vore ein aktiv pådrivar for å avvikle pelsdyrnæringa i landet. I fagbladet bistandsaktuelt, utgitt av norad, kan ein lese om at WWF sine prosjekt er kopla til brot på menneskerettane, vald og overgrep.

Årets tv-aksjon går til ei svært viktig sak, fjerning av plast i havet utafor Asia. Masfjorden SP trur ein får mykje meir ut av innsamla midlar ved å støtte ein mindre organisasjon i dette arbeidet, ein som ikkje brukar store summar på administrasjon og direkte lønningar.

Miljødirektoratet sin miljøstatus viser at Noreg er eit av dei landa i verda som nyttar mest plast pr. innbyggjar, og me forureinar havet med ca 7 gonger meir plast enn gjennomsnittet. Det meste av dette kjem frå fiskeri- og oppdrettsnæringa

Masfjorden Senterparti vil i år støtte organisasjonen In the same boat. Dette er ein ideell organisasjon som består av frivilling ungdom frå heile verda, og som har som mål i 2020-2025 å rydde 20.000 strender langs verda si nest lengste kystlinje, norskekysten. I haust har dei blant anna brukt 2 veker på å rydde 8 tonn plast frå kysten på Fedje.

På nettsida Inthesameboat.eco kan ein lese kva innsamla pengar vil gå til. Det er oppretta ein spleis der dei som ynskjer det kan støtte denne organisasjonen.

Masfjorden Senterparti - Leiar Geir Egil Haugsvær