Krigen i Ukraina har forferdelege følgjer. Den folkerettsstridige krigen Russland fører, utset mange sivile for drap, tortur og terror. Ukrainarane kjempar ein eksistensiell kamp for retten til eige land og eigen kultur, og for å tilhøyre Europa. Krigen krev enorme ofre, både militære og sivile.

Denne sommaren køyrde Knut og Sturla (biletet) ein pickup frå Oslo til søraust i Ukraina. Soldatane som fekk bilen, var imponerte over at fleire enn 150 personar i Noreg hadde vore med og støtta innsamlinga vår. No er vi fire kollegaer som drar i gang ei ny innsamling. Målet vårt er 75 000 kr, som rekk om lag til to bilar. Bilane reddar liv. På biletet nedanfor ser vi ein annan bil frå Noreg som frakta medisinsk utstyr og var i bruk allereie dagen etter at han blei levert.

Situasjonen i Ukraina endrar seg stadig, og i det siste har vi sett at dei russiske drone- og rakettåtaka oftare og oftare råkar sivile mål som persontog, kjøpesenter, marknader og kyrkjer. Ukrainarane lever under konstant trussel om okkupasjon, drap, terror og utvisking av retten til sjølvbestemming. Nokre av soldatane vi snakka med i sommar, hadde sjølve opplevd russisk okkupasjon i starten av krigen, og nettopp det hadde fått dei til å verve seg.

Det ukrainske militæret fører ein tapper kamp, og treng all den støtta det kan få. Vi er fire kollegaer som ønskjer å bidra så godt vi kan. For å hjelpe til med evakuering av folk og transport av utstyr ved fronten, trengst det bilar som kan køyre i skytteltrafikk fram og attende. Bilane må ha firehjulsdrift, vere dieseldrivne og ha manuelt gir.

Sjåførar står klare til å føre bilane heilt fram og overleverer dei direkte til mottakarane ved fronten. Vi vil oppmode alle til å gi ein skjerv og gjennom det bidra til ukrainsk siger.

Слава Україні! Героям слава! / Ære vere Ukraina! Ære vere heltane!