Eg skriv dette på vegner av ein kollega.

Ho er no aleinemor til to barn. Etter samlivsbrotet med eksmannen måtte ho flytte ut av huset dei kjøpte saman. Han nekta å selje huset, men for å gi barna sine ein trygg og stabil plass å bu, klarte ho å kjøpe seg eit «nytt» hus med hjelp frå Husbanken.

Etter dette slutta han å betale rekningar knytte til huset dei framleis eigde saman, mellom anna husforsikringa. Ho sat att med eit økonomisk ansvar ho ikkje hadde moglegheit til å bere åleine, og til slutt måtte ho ta det vanskelege valet å seie opp forsikringa.
Kort tid etter brann huset dei eigde saman i Fosnavåg ned. Politiet og brannvesenet har framleis ikkje kunna fastslå kva som forårsaka brannen.

Etter brannen reiste eksmannen til Latvia, men kom aldri tilbake. Han vart funnen død 17 dagar etter at han vart meldt sakna på heimvegen tilbake.

No står ho i stor fare for å miste huset ho bur i. Ho må betale huslånet som eksmannen ikkje har betalt sidan juni. Summen er på 28 000 kroner, og denne må betalast innan utgangen av månaden.

Som om ikkje dette var nok, har huset ho bur i no fått store problem med avløpssystemet. Røyra må bytast ut heilt frå huset og ut til gata.  Forsikringa dekkjer berre ein viss prosentdel av kostnadene. Resten (20 000 kr) må ho og naboen dekkje, sidan avløpsrøyret hans er kopla saman med hennar. Naboen nektar no å betale sin del.
Ho har søkt om hjelp frå NAV, men har enno ikkje fått svar. Ho er no sjukmeld og klarer ikkje å betale alle rekningane som hopar seg opp. Med berre éi inntekt frå arbeidet som reinhaldar, er det rett og slett ikkje mogleg å få løna til å strekkje til for alle dei faste utgiftene og rekningane som må betalast.

Ho hadde aldri trudd at ho skulle hamne i ein situasjon der ho måtte opprette ein spleis og be andre om økonomisk hjelp. Ho oppretta tidlegare ein spleis etter husbrannen og fekk inn rundt 3 600 kroner. For det er ho svært takksam. Ho forstår òg at det var mykje å be folk om å bidra til gjenoppbygging av eit nedbrent hus.
Men situasjonen har no blitt endå vanskelegare.

Eg håpar vi alle saman kan finne nokre kroner å bidra med, slik at ho får éi bekymring mindre å tenkje på medan ho handterer sorga, tek vare på barna sine og prøver å kome seg tilbake i arbeid.
Alle bidrag, store som små, vert tekne imot med stor takk.

Biletet av huset er ekte, men er forbetra med AI. Informasjonen i teksten er korrekt og er delt med samtykke frå kollegaen.