I samband med FN-dagen og Bokveka gjennomfører Halbrend skule i veke 45 ein leseaksjon til inntekt for SOS-barnebyar. Leseaksjonen er ein viktig del av solidaritetsarbeidet ved skulen vår.

Elevane våre les for at andre barn skal få lære å lese. Gjennom aksjonen ønskjer vi både å skape leseglede og styrkje leseutviklinga hos våre eigne elevar, samstundes som vi bidreg til at barn i andre delar av verda får betre moglegheiter til læring og utdanning.

SOS-barnebyar er til stades for barn før, under og etter kriser. I krig og konflikt hjelper dei mellom anna barn som er åleine, familiar på flukt og barn som treng tryggleik, omsorg og utdanning. I nokre område, til dømes på Gaza, driv SOS-barnebyar eigne opplæringsaktivitetar.

Leseaksjonen går ut på at elevane registrerer kor mange lesekvarter dei har, både heime og på skulen, i løpet av veka. All lesing tel! Det kan vere bøker, biletbøker, teikneseriar, lydbøker eller høgtlesing.

Elevane finn sine eigne sponsorar og avtalar eit høveleg beløp per lesekvarter. Til dømes vil 20 lesekvarter à 5 kroner gje 100 kroner til aksjonen.

Målet er å skape leseglede og leselyst hos elevane våre, samstundes som vi viser solidaritet med barn som ikkje har dei same moglegheitene som oss. Saman kan vi gjere ein forskjell – eitt lesekvarter om gongen!