Gje ditt bidrag til årets TV-aksjon og støtt arbeidet med å redusera plastforsøplinga av havet!

Søndag 18. oktober går årets TV-aksjon av stabelen. I år vert det ein annleis aksjon. Grunna korona-pandemien kan me ikkje samla inn pengar med dei tradisjonelle bøssene våre, men du kan likevel bidra. Dette året vert innsamlinga elektronisk, så gje ditt bidrag på vips, spleis eller ved å betala inn på kommunen sitt kontonummer. I år går pengane til WWF sin aksjon for å redusera plastforsøplinga i havet. Havet er svært viktig for miljøet og alt liv på kloden. Med ein veksande verdsbefolkning må me i framtida henta stadig meir av maten vår frå havet. For at dette skal la seg gjera må sjøen vera rein og fri for forureining!

Me har lenge vore klar over at verda har ei gigantisk utfordring knytt til forureininga av verdshava. For nokre år sidan gjekk Neptun seniorklubb i bresjen for ein storstilt ryddeaksjon av skjergarden i Austrheim. Dei fekk god hjelp av barn og unge frå  skulane og barnehagane våre, samt bygdelag og andre frivillige som ville ta eit tak for å betre miljøet i strandsona og på sjøen. Ryddeaksjonane var ein suksess og mykje søppel vart fjerna frå skjergarden og levert til NGIR. Aksjonane for å redusera den marine forsøplinga går no vidare. Frå årskiftet og i tre år framover vil prosjektet Rydd Norge bruke profesjonelle aktørar for å fjerne plast i den norske skjergarden. Aksjonen vil bli finansiert av Handelens Miljøfond, ein organisasjon som hentar sine inntekter frå plastposeavgifta. Me har gjennom våre aksjonar i skjergarden starta oppreinskinga av verdshava, men for at det skal monna må det også gjerast ein betydeleg internasjonal innsats. Det er dette pengane frå årets TV-aksjon skal gå til. Ved å støtta årets TV-aksjon er du med å løysa ei av dei størst miljøutfordringane me har på kloden i dag, plastforureininga av verdshava. Me har alle eit ansvar for plastforureininga me ser i sjøen, så la oss saman gjera noko med den. Gjer det ved å gje ditt bidrag til årets TV-aksjon.