Midt i Gloppen kommune ligg perla Breim. Her finn du Norsk Fjordhestgard, eit senter for avl og bruk av fjordhesten. I storslått vestlandsnatur ligg anlegget vårt. Vi tilbyr til vanleg aktivitetar både innandørs og utandørs, både rideundervisning og idylliske og spennande turar på hesteryggen.

​Året 2020 er eit år som har bydd på utfordringar, også for oss. Koronaviruset har satt ein effektiv stoppar for alt av aktivitetar, og dette er vi sjølvsagt svært lei oss for. 

Men vi har ikkje lyst til å gje opp, og kva høver vel betre i slike tider enn å ta tak i det som har stått som ein verkebyll lengst? 

Stallen Norsk Fjordhestgard held til i, er eit gammalt kyr- og grisefjøs. I 1988, tre år etter at Gloppeneventyret hadde starta, gjekk ei samling hesteinteresserte bygdefolk saman for å skape eit felles område for alle som dreiv med hest - og til slutt stod stallen klar med 4 stallavdelingar, salrom i den tidlegare siloen og vaskespilt i det som ein gong var mjølkerommet. Garden har frå starten av vore ein dugnadsstall, og låvebrua var då som no fylt med foreldre, hestekarar og oppstallørar som sette seg ned for ein kopp kaffi og ein god prat.

Men fjøsen er bygd med eternittplater på taket, og desse platene er etter kvart blitt så dårlege at det medfører risiko for alle som ferdast eller har arbeidsplassen sin på Norsk Fjordhestgard. Takrennene blir fulle av eternittfliser som renn av taket, det blir støv og skit på loftet - med asbest i, vi får vasslekkasjar som øydelegg taket inne i kantina, i yttergangen, på toaletta og på kontoret. I det heile er det ikkje noko særleg helsefremjande - og heller ikkje særleg fint å sjå på. 

Difor startar vi no ein spleis, for å sjå om vi kan greie å samle inn nok pengar til å gjere noko med det. Målet er ambisiøst, men ein har igjen for det i framtida - all den tid ein ønskjer å ha Norsk Fjordhestgard som eit aktivt og flott tilbod i Breim og Gloppen. 

Om du ønskjer å bidra, så set vi stor pris på det! Målet er å komme i gang med arbeidet til våren, slik at bygget kan stå klart - og trygt - til sommarsesongen byrjar i 2021. Både for dei lokale born og vaksne som har ei genuin eller gryande hesteinteresse, samt for turismen i Breim og Gloppen. Vi har allereie fått prisantydninga på trygg sanering av eternitt-taket, no treng vi berre å skaffe kapitalen til å få gjennomført alt. 

Hjelp oss å sikre dei neste 30 - 40 åra som ein kulturinstitusjon for den norske fjordhesten - vi set umåteleg pris på kvart eit bidrag!