Spleis-aksjonen for Fjellhaugen Skisenter er no avslutta – og me sit att med ein enorm takksemd og eit stort smil.

Over 300 givarar har vore med og bidratt, og til saman er det samla inn nesten 250.000 kroner som går direkte til drifta av Fjellhaugen Skisenter. Det er heilt fantastisk – og langt meir enn me våga å håpa på då me sette i gang.

Dette har vore ein ekte dugnad. Frå privatpersonar og familiar, til lokale bedrifter og støttespelarar frå heile Kvinnherad – frå fjord til fjell. Kvar einaste krone, kvar deling og kvart gode ord har betydd noko. De har vist at Fjellhaugen ikkje berre er eit skisenter, men ein viktig møteplass og ein del av hjartet i bygda vår.

Takka vere dykk kan me halda bakkane opne, løypene tråkka og vintergleda levande – for born, ungdom, familiar og alle som set pris på snø, fjell og fellesskap.

Me vil rette ein særleg stor takk til alle som har bidratt økonomisk, til dykk som har delt bodskapen vidare, og til dei som har heia på oss gjennom heile prosessen. Dette hadde me aldri klart åleine.

Tusen takk for støtta, tilliten og engasjementet.
Me gler oss til å ønskja dykk velkomne til Fjellhaugen – no og i framtida.

Me sjåast i bakken! 🎿❄️💙

Folkens – no nærmar me oss målstreken. Og om det er noko Fjellhaugen veit, så er det at dei siste metrane alltid er dei hardaste… og dei viktigaste.

Men sjå her: 290 gode givarar har alllereie vore med og løfta oss, og det er heilt fantastisk! Tusen, tusen takk til kvar einaste ein – frå barnefamiliar til bedrifter, frå Rosendal til Uskedalen, frå Husnes til Ænes. De har vist kva Kvinnherad handlar om: varme hjarte, sterke fellesskap – og ein god dose dugnadsånd.

Men… me er ikkje heilt oppe på toppen enno. Me skimtar lyset frå varmestova, men me må ta eit siste rykk før Spleisen stenger 15. desember.

Så her kjem oppmodinga – varm, vennleg og litt rampete:

Har du enno ikkje slengt inn ein slant? No er tida inne.
Har bedrifta di vurdert det? No er sjansen før dørene lukkar.

Om du gir prisen av ein kaffi, ein vaffel, eller ei lita løypemaskin (heia dykk, Hydro!) – alt hjelper. Kvar krone går rett til å halda bakken open, løypene tråkka og vintergleda levande i heile dalføret.

Fjellhaugen er ikkje berre eit skisenter. Det er snøglede, barndomsminne, familiedagar, ungdomsfart og kvardagsmagi. Det er kommunen sin vinterpuls – og den pulsen vil me ikkje miste.

Så kom igjen, Kvinnherad – private, bedrifter, hytteeigarar og alle som har hjarte for fjellet:

👉 Bli med på siste løftet før 15. desember!
Gje litt, del vidare – og hjelp oss halde Fjellhaugen levande.

Tusen takk for at de står saman med oss.
Me sjåast i bakken – med smil, snøsprut og open heis.

I dag har næringslivet verkeleg meldt seg på i den gode kampen: I løpet av dagen har me fått tilsagn om nær 100.000 (!) blanke kroner frå framoverlente Kvinnherad- bedrifter. Hydro, Nordic Fender og Widecon har opna lommeboka, og gitt sitt bidrag til skiglede for unge og gamle. Me er ekstremt takksame, imponerte og ja, rett og slett- hoppande lukkelege for at så mange gode krefter smører skia, og er med og lyftar i flokk! Men finst det endå fleire givarglade bedrifter der ute?

Havbruksnæringa: De kan alt om å halda ting flytande?

Byggenæringa: No er det Fjellhaugen som treng støttebjelkar!

Reiselivet: Gje ein slant før vinterturistane spør kva som skjedde?

Industrien: Støtt Fjellhaugen- før me må begynna å renna på pallar frå fabrikktaket!

Energibransjen: Gje eit påfyll av livsenergi til Fjellhaugen, så lovar me å sikre energiske medarbeidarar tilbake etter ein vinterdag i skibakken!

Så kva seier de, er det fleire bedrifter som vil vera med og trakke skispor? Ikkje gøym dykk bak gardinene i lunsjpausen, bli heller med og skap bulyst og energi! 

141 Kvinnheringar har allereie støtta Spleisen for Fjellhaugen.

Det er rått! 

Men… det betyr også at 12 948 av oss tek sjansen på at ungane må lære å stå på ski gatelangs i Rosendal sentrum i framtida.

Og det trur eg ingen av oss vil sjå.

For utan Fjellhaugen blir det verken kveldskøyring, vaffel i solveggen, eller den klassiske “eg skal berre éin gong til”-turen før heisen stenger.

Så her er utfordringa:

Kan me få fleire enn 141 – ja, kanskje heile Hatlestranda, Uskedalen og halve Ænes – til å slenga inn ein liten slant? Får me med Herøysund og Husnes også?

Eit bidrag treng ikkje vere stort- men det betyr ALT for å halda hjula i gang i Fjellhaugen.

Klikk på Spleisen.

Gi litt.

Del vidare.

La oss visa at Kvinnherad står saman, når snøen og vintergleda treng oss!

P.S: I helga fekk med det fyrste drysset med vintermagi i Fjellhaugen. Me tek sikte på å starte snøkanonene denne veka, så PLUTSELEG er det skiføre!

Me er audmjuke og EKSTREMT takknemlege for at heile 50 givarar har gitt sitt bidrag, berre eitt døgn inn i kampanjen! 20 TUSEN TAKK!