Boka om Harastølen gjekk til topps i nasjonal konkurranse! Nytt bokprosjekt på gang:-)
På tide med ein stor takk til alle som støtta dette bokprosjektet! Her kjem ei oppsummering over kva som har skjedd sidan sist oppdatering: Eg kom i mål! Her er den flotte boka om Harastølen!

Boka vart akkurat slik eg ville ha ho, og som ein historisk plass som Harastølen fortener.
August 2023: Lansering av boka på Sogndal bibliotek. Fullt hus og strålande tilbakemeldingar. Folk kom heilt frå Voss for å vera med på lanseringa, og sjølvsagt var det kjekt at så mange lustringar og sogndøler møtte fram.
Jan Nyberg i BT var fyrst ut med vurdering av boka. Boka fekk 5 av 6 hjarter:-)
Etter det har det gått slag i slag med føredrag over heile Vestlandet; frå Bergen til Lom. Folk i alle aldrar er interessert og engasjert i historia og framtida til Harastølen.
Ros frå alle kantar
Vurderinga i Klassekampen 23.12.2023 var den beste julegåva ein forfattar/forleggar kan få. "Oddrun Midtbøs bok om Harastølen oser av litterær kvalitet og grundighet. ... Midtbø har klart å skape en perfekt balanse mellom å skildre enkeltmennesker så de fremstår på levende vis, og å gi oversikt over de store linjene i medisinsk utvikling." (Litteraturkritikar Espen Stueland, som har skrive fleire historiske bøker innafor medisin)
Likeins ord frå litteratur- og filmkritikar Britt Sørensen: "For et praktverk Oddrun Midtbø har begått med denne vakre boken!
Jeg leser og leser. Blir oppslukt, opplyst og rørt. Gleder meg over alt jeg har igjen å lese, over fantastiske fotografier, nydelige illustrasjoner og den imponerende researchen som ligger bak. ... Oddrun Midtbø går til kjernen av Harastølens historie. Undertittelen «Heimen for dei utstøtte» sier sitt. Dette er norgeshistorie, sykehistorie og menneskehistorie på sitt beste. Et viktig verk, som jeg håper mange leser."
Sjølvsagt var det stort då eg kunne gå opp på scena i Litteraturhuset i Oslo for å ta imot prisen for "Årets indiebok 2023" i kategorien sakprosa! (Omgrepet "indie" kjem frå det engelske ordet "independent" - altså sjølvstendig/uavhengig - i denne samanheng)
Frå grunngivinga til juryen: "Språket sitrer og vitner om en respekt for temaene i boka, nynorsken er nydelig og levende, den litterære kvaliteten høy, illustrasjonene flotte, layouten profesjonell og researchen bak boka god, og bruken av farget tekst viser omtanke for leseren og en solid evne til å lage bøker som faller i smak. Dette er virkemidler som sammen gjør utgivelsen til ei bok av ypperste klasse."

Tre opplag på fire månader
Dei fyrste 1900 eksemplara vart fort selde, likeeins 2. opplaget på 1000 bøker. Av 3. opplag på 2000 bøker har eg att rundt 1000 bøker på lager.
Denne overveldande responsen gav meg så mykje energi at eg no er i gang med ein naturleg oppfølgjar av boka om Harastølen. Det gav meg òg pengar nok til å betala for produksjonen av boka, i tillegg til inntekt til meg sjølv. Erfaringane med Spleis, førehandssal og etablering av eige forlag har ført meg over til å satsa vidare på produksjon av bøker.
Dei lobotomerte
Undervegs i arbeidet med Harastølen-boka, oppdaga eg ein slektning eg ikkje visste om, ei grandtante som levde heile sitt liv på "Valen sinnsjukeasyl". Og eg støytte på menneske som helst skulle skjulast, spesielt etter at dei hadde vore gjennom ein operasjon som lobotomering. "Ein skamplett i norsk psykiatrihistorie" skreiv ein psykiatar til meg. Eg vart hekta. Eg vil vita meir om kvifor Noreg var blant dei landa som brukte denne metoden mest, og kvifor det var mykje brukt på dei som hadde ein sterkt vilje, og kanskje speisielt kvinner. Mange spørsmål må få svar.
Eg er i full gang med å leita etter infomasjon, intervjua slektningar av folk som vart utsatt for denne metoden (bora hol i hovudet for at dei skulle få eit betre liv, eller var motivasjonen mest at det skulle bli rolegare på avdelingar med knapp bemanning?). Eg er oppteken av å vera sakleg og nøktern, og at påstandar skal kunne dokumenterast. Målet er lansering i 2025.
Så på nytt: Tusen takk for at de hadde tru på meg då eg samla inn pengar til boka om Harastølen for tre år sidan.
Blir de med på neste prosjekt? Gå inn på OMI forlag og bestill boka på førehand, eller følg med på den nye Spleisen som eg opprettar i løpet av dagen i dag.